(Image by heraldsun.com)

Isumat.com/8:32AM, May 21, 2020

Upat na ka adlaw nga waray magpapagawas hin resulta han Confirmatory Test han swab samples an Eastern Visayas COVID-19 Regional Testing Center ug an publiko in napapa-usa na kun kay-ano nga tigda man la nagmiringaw an mga impormasyon mahitungod hin swab results.

Han una nga semana, arangkada dayon an EVRTC ha pag proseso han mga samples ngan iginkalipay ini han ngatanan labi na an mga opisyales han mga Local Government Units kay dako an bulig hini han mga pitad nga angay nira buhaton ha ira mga lugar labi na an may mga nag positibo han virus.

Kakulop, an DOH-Regional Office in nagpagawas hin advisory nga temporaryo gin-undang an laboratory testing ha EVRTC tungod kay na-ubusan han Extraction and Detection Kits nga kinahanglan basi makumpirmar kun natapnan in usa nga tawo han corona virus.

Sumala pa han ahensya, waray kadudul-ong nganhi ha Eastern Visayas ini nga testing kits tikang ha Villamor Air Base ha Pasay tungod nga waray makalupad an mga eroplano tungod han bagyo Ambo. Hinungdan hini, waray la anay Confirmatory Test samtang deri pa naabot an nasabi nga mga higamit.

Hapagkayana, sobra pa hin 500 nga samples an igpapailarum han testing ha EVRTC.

Kasumpay hini, an Provincial Government han Samar in nagdesider nga pumalit han ira kalugaringon nga testing kits. Subay han impormasyon, 4,500 nga testing kits an papaliton han lalawigan basi gamiton para han ira mga residente.

An bungto han Tarangnan nga sakop han probinsya in nagkaada hin local transmission an COVID-19 ngan 21 na ka tawo an natapnan dida han bungto. Kasagaran han mga swab samples in tikang han nasabi nga munisipalidad. # (KEVIN SIOSANA)