Isumatcom/Pebrero 7, 2022
Usa nga superbisor hin konstraksyon an iginreport nga nagpakamatay pinaagi hin pagbitay han iya kalugaringon ha downtown Tacloban City, pasado alas 5 han kulop, Pebrero 6, 2022.
Subay han report han PNP, an biktima in ginkilala nga hi Eddie Fernandez, 51 anyos, taga Caloocan City ngan temporaryo nag-uukoy denhi ha Tacloban City tungod han iya trabaho komo Project Supervisor hin usa nga konstraksyon.
Nagsering an mga imbestigador nga an houseboy han gin-uukyan nga building han biktima an nakadiskubre nga nabitay na an lawas ni Fernandez ha sulod han iya gin-uukyan nga kwarto ha 4th floor hin usa nga establisemento ha Avenida Veteranos.
Ginhigtan han biktima an iya liog ngadto han alkoba nga amo an rason han iya kamatayon.
Padayon an imbestigasyon basi maklaro kun tinood nga nagpakamatay an biktima o may foul play han insidente. #
