Isumat.com/6:13AM, Marso 18, 2021

Natapnan han Covid-19 hi Leyte 1st Dist Rep. ngan House Majority Leader Ferdinand Martin Romualdez.

Dida han iya pahayag ha social media pira pala ka oras an nakalabay, iginsumat han magbabalaud nga nagpa swab test hiya ngan kakulop gumawas an resulta nga positibo hiya han virus. Buwas nga adlaw, magkakaada hiya hin re-swab, dugang pa han kongresista.

Kasumpay hini, iya naman iginpahayag nga bisan kun mayda niya gin-aabat nga mga sintomas han sakit, maupay an kahimtang han iya panlawas. Hiya in naka-kwarentina yana ngan iya gin-aghat an iya iginka-urusa hadin nag-agi nga pira ka adlaw nga mag-isolate gihapon.

Nagpatapod hi Romualdez nga mabalik hiya dayon ha kongreso ngan aatubangon dayon an iya mga obligasyon komo magbabalaud ngan Majority Leader ha takna nga hul-os hiya matambal tikang han impeksyon han kagaw.

Nanawagan gihapon hiya ha publiko nga ig-ampo an mga frontliners nga amo an dako an sakripisyo yana nga panahon hin pandemya ha paghatag hin serbisyo ha katawhan.

Hi Romualdez an ikaduha nga miembro han kongreso nga taga Eastern Visayas nga natapnan han kagaw. Han una nga tuig, hi Northern Samar Congressman Paul Daza in na-alakbatan han Covid ngan dayon naman naka-recover. #