Isumat.com/Hunyo 2, 2022
Magtitikahilarom an imbestigasyon han PNP-Criminal Investigation and Detection Group (CIDG) Regional Field Office mahitungod han nahitabo nga pangaro hin kwarta hin usa nga empleyado han Bureau of Fire Protection (BFP) Eastern Visayas ngadto hin usa nga aplikante ka bumbero.
Dida han interview han iFM-RMN Tacloban, iginsumat ni PMajor Glenn Aculana, CIDG Deputy Regional Head, nga posible mayda opisyales han BFP nga nagpapaluyo han kiwa ni Fire Officer 1 Karla Rodriguez nga pag-aro hin kwarta han aplikante nga hi Evelyn Orbeta.
Kun manunumduman, hi Rodriguez nga nakadestino ha BFP-Guiuan, Eastern Samar, in nadakop han mga operatiba han CIDG ha entrapment operation hadin Mayo 27, 2022 ha usa nga mall denhi ha Tacloban kun diin an suspetsado in na-aktuhan nga nakarawat hin 50 Mil pesos tikang kan Orbeta.
Antis pa hini, an biktima in nakagpadara pinaagi ha Gcash hin 60 Mil ngadto han suspetsado. Ini nga kwarta in basi masegurado nga makakasulod an biktima ha BFP. 150 Mil pesos an ginkasabutan nga ighahatag han aplikante, subay han affidavit han biktima.
Hi Aculana in nagpahayag nga dako an posibilidad nga deri la hi Rodriguez an naglugaring hini nga plano kay kun kikita-on an iya ranggo nga FO1, waray niya kapas nga maka-impluwensya han proseso pagpili han makakasulod nga mga aplikante ha BFP.
Iginpatapod han CIDG Official nga makikigsumpayan hira ha liderato han BFP-Region 8 basi matugkad kun mayda pa iba nga personales han ahensya an nalalamibigit han modus operandi.
Hi Rodriguez in ginsampaan na hin reklamo ha pakasupak han RA 9485 o Anti-Red Tape Law. An City Prosecutors Office an magdudumara han pagtirutimbang kun magsasampa hin pormal nga kaso ha korte kasumpay hini nga insidente.
An suspetsado in temporaryo nga nakagawas ha karsel tungod han piyansa nga 30 Mil pesos.
Ginklaro naman ni Aculana nga deri extortion o pangikil an iginsampa nga reklamo ha prosekusyon kay waray man nahitabo nga panarhog dida han transaksyon ha butnga han suspetsado ngan biktima. #
