(File photo philippinelifestyle,com)

Isumat.com/1:10PM,July 9, 2020

An mga kasundaluhan nga kaapi han 14th Infantry Battalion nga nakabase ha Mahaplag, Leyte an nakasalbar hin duha nga batan-on nga kababayen-an nga lumitas tikang han rebelde nga kagi-usan.

Sumala han report han 14th IB han Philippine Army, an 19-anyos nga hi alias Ernie ug an iya bugto ngahi alias Shane, 17 anyos, in nagdesisyon nga bumulag na tikang han kumunista nga mga rebelde. Nagsumat an duha nga mga miembro hira han NPA ngan waray na hira pakaka-antos han pan-abuso han ira grupo.

Naka-tyempo hira Ernie ngan Shane nga maka-ikyas tikang han ira kampo ha kagugub-an ngan pira ka oras nga nagsulukit-sukit ha kagurangan basi la maka-eskapo.

Hira in gin-ayudahan han 14th IB ha panguna ni LtCol Roberto Obaob nga dayuday maka-eskapo tikang han naghahalpat ha ira nga mga rebelde. Igintubyan han duha nga kababayen-an ngadto han mga sundalo in usa nga kalibre 45 nga pistola ngan mga bala.

Kasumpay hini, mahugot nga ginkondenar ni Obaob an mga rebelde dara han iraa pag-abusar ngan pag-guba han kabubwason han mga batan-on pinaagi han pagpirit nga umapi han ira kagi-usan. Nanawagan an opisyal ha mga kag-anak nira Ernie ngan Shane nga sumubad han ginbuhat han ira mga anak nga bumalik ha piyod han balaud.

Nanawagan gihapon hi Obaob ha ngatanan nga kag-anak nga bantayan hin maupay an ira mga anak kay bangin malipat han magtam-is nga mga pagkumbinser han rebelde nga umapi ha ira. #