Isumat.com/7:22AM, August 26, 2020

Mayda na natabo nga re-infection o ikaduha ka beses nga nagpositibo han Covid-19 denhi ha Eastern Visayas sumala han report kakulop han DOH Regional Office.

Ini nga pasyente in taga Catbalogan City, Samar pero nagtatrabaho hiya komo Health Worker ha Tacloban City. Dida han pahayag han DOH kakulop, hiya in lakip dida han 115 nga bag-o nga kaso han Covid han rehiyon. Hiya in 30-anyos nga babaye. Hadton Hunyo 22, nagpositibo hiya han virus ngan paghagos hin pira ka semana, naka-recover na. Pero natapnan liwat subay han resulta han swab test nga ginpagawas kakulop.

Hiya an matutudlok nga gisasyahani nga insidente hin re-infection ha Sinirangan Bisayas. Ini nga kaso in pag-iistudyuhan hin hingpit han mga otoridad tungod kay talagsaon la ini nga panhitabo.

Hadin Lunes, iginreport han mga otoridad han panlawas ha Hongkong nga mayda didto kaso hin re-infection kun diin an pasyente an nagpositibo hadton Marso ngan natapnan na liwat katapos hin upat ka bulan. Kasumpay hini, nag warning an DOH ha publiko nga deri gud magin kampante kun nakatalwas na tikang han virus kay aada an posibilidad nga utro matapnan han kagaw.

Ha luyo nga bahin, padayon an paglobo han mga kaso ha Catbalogan tungod han 40 nga pasyente nga nahidugang kakulop. Hira ngatanan in mga close contacts han mga naha-una nga natapnan.

Nadugangan gihapon hin 26 nga kaso an Tacloban City ug ginlalakipan ini hin pira nga Health Workers. An iba in natapnan pinaagi han Local Transmission.

Upat naman an nahipatik nga kaso ha Tarangnan. Sumala han LGU, ini nga upat in na-confine ha Samar Provincial Hospital tungod hin iba nga sakit. Pero han makagawas na hira ha hospital tungod kay natambal na hira han ira balati-an, natapnan lugod hira han corona virus.

An Villareal may bag-o nga 11 nga kaso, Zumarraga-8, Paranas-4, Hinabangan-4, ngan Marabut-1. Hira ngatanan in mga close contacts han mga nagpositibo hanhadi.

Ha probinsya han Leyte, mga close contacts gihapon an bag-o nga mga positibo: Tanauan-6, Palo-5, Abuyog-1, ngan Dulag-1. Usa nga LSI an bag-o nga kaso ha Kananga.

Tulo naman nga Locally Stranded Individuals an nagkatatapnan ha Tomas Oppus, Southern Leyte.

1,439 na an naka-recover ha Eastern Visayas dida han 2,363 nga nagkatatapnan ngan 16 an namatay. An mga Health Care Workers nga nag positibo han virus in aada na ha 263 samtang an Active Cases hapagkayana in 909. #