Isumat.com/Enero 23, 2023
Usa nga miembro han CAFGU ngan usa nga parag-uma an nahidugang han nagtitikahilaba nga listahan nga mga biktima hin panmatay ha Calbayog City.
Hadton Sabado, Enero 21, 2023, an CAFGU member nga hi Crisanto Domayan, 57 anyos in namatay han pusilon alas 6:40 han aga ha Brgy Himalandog. Ginkilala naman an suspetsado nga hi Noli Sameniano. Hira Domayan ngan Sameniano in pareho residente han mao nga barangay.
Ha report han PNP Regional Office, temprano pa hadto nga aga, an biktima in naglibotlibot ha ira barangay bitbit in homemade shotgun ngan sundang ngan nagpipinangayat hin agway. Nahingadto hiya ha balay han suspetsado nga hadto nga takna in nag-aareglar han lamay han iya misis nga namatay.
Hi Sameniano in tigda nga kumuha hin pusil ngan ginpabuthan an biktima nga nag-antos hin pira nga igo hin bala ha lawas rason han iya kamatay. Kadagmitan naman nga umiskapo an gintatahapan.
Samtang, hadton Biernes, Enero 20, 2023, nag-uuma la intawon hi Romnick Garalza, 34 anyos, han pusilon hin waray hikilal-i nga suspetsado.
Natabo ini pasado alas 6 han aga didto han umhanan han biktima kun diin may lalaki nga dumaop ha iya ngan ginpusil hiya hinungdan han iya kamatay.
Kumalagiw dayon an suspetsado ngan ginhahalpat hapagkayana han kapulisan han Calbayog City. #
