Isumat.com/8:40AM,May 4, 2020

Puede na makagawas tikang ha hospital an 58-anyos nga babaye nga taga Burauen, Leyte nga amo an ika-lima nga nag positibo han COVID-19 ha Sinirangan Bisayas.

An DOH-Regional Office in nagpahayag kagab-i nga nag-negatibo na an resulta han swab sample hini nga pasyente, ngan subay han DOH protocol, puede na hiya ma-discharge ha hospital, pero magkaka-ada pa hin porlomenos 14 dias nga home isolation period. Ini nga pasyente in naka-admit ha EVRMC-Magsaysay(Tacloban).

Amo ini hiya an babaye nga may travel history tikang ha Manila ngan umuli ha Burauen antis an National Lockdown. Gintotoohan gihapon nga natapnan niya an iya umangkon nga naka-confine yana ha Burauen District Hospital.

Iginpasabot gihapon han DOH nga negatibo ha corona virus an 41 ka tawo ha Burauen nga ginkuhaan hin swab samples hadton Abril 24 ngan Abril 25. Upod denhi an mga iginka-urusa han mga nag positibo ha Burauen sugad man an mga personales han Rural Health Unit.

An duha nga barangay kun diin nagtitikang an mga pasyente in aada ha Total Lockdown samtang an bug-os nga bungto in iginpabilin ha Enhanced Community Quarantine.

Mayda gihapon hadto iginka-urusa han Burauen Positive Case nga mga taga Tanauan, Leyte pero negatibo an resulta han confirmatory test. # (KEVIN SIOSANA)