Isumat.com/8:01AM, October 10, 2020

Ginklaro han DPWH nga sarado la gihapon ha trapiko ngan paggamit han mga motorista an kalsada nga nagsusumpay han Burauen ngan Albuera, Leyte.

Dida han panginsayod han Isumat.com, nagpahayag an Leyte 4th Engineering District nga waray pa abrihi ha publiko ini nga kalsada nga maiha na hin duro nga ginpapamulat nga matapos na. Nagpapadayon pa an pag-ayad hin pira nga parte han kalsada ngan mayda pa ngani ginhihimo nga mga pagsemento ngan “blasting”.

Ini an pagklaro han ahensya ha atubangan han nagkagawas nga mga litrato ha social media nagpapakita han sementado nga kalsada ngan nagpapasamwak nga naagi-an na daw.

Nagsering an DPWH nga an mga litrato in tikang hin mga nagbibisikleta nga gintugutan la nga maka-agi, pero deri pa ini “passable” para han transportasyon kay deri pa tapos an proyekto.

Maiha na nga katu-igan an paghinimo hini nga kalsada ngan nadedelatar tungod han problema han right of way ngan NPA-Infested an pira nga parte han lugar. Sobra la hin 30 kilometros an distansya hini, sanglit dako an maiiban ha oras han pagbiyahe tikang han pira nga bungto han Leyte ngadto ha Ormoc City.

Waray pa liwat iginhatag nga petsa an DPWH kun san-o gud magagamitan ini nga proyekto nga ginpondohan hin haros 200 Milyones pesos. #