Isumat.com/3:32PM, May 31, 2020
Duha katawo an nag-antos hin injury ha magkalainlain nga parte han ira lawas han pagdagmalan hin buhawi an ira kinamumutangan nga Border Control/Checkpoint ha Kananga, Leyte.
Subay han report tikang ha Kananga-LGU, an mga nag-antos hin karamtan ha lawas amo hira Patrolman Nino Jesus ngan Kagawad Rolando Graho han Brgy Lonoy, Kananga.
Dida han impormasyon tikang kan Mayor Matt Torres, kanina han pasado alas 11 han aga, naka-duty ha checkpoint an duha nga mga biktima upod an iba pa nga personales han tigda la pagbayuhon hin buhawi an nasabi nga lugar ug nahipalid an tent nga kinamumutangan han grupo ngan naigo han iginkakapalid nga mga butang hira Jesus ngan Graho.
Kadagmitan naman nga gindara ha Kananga Municipal Hospital an duha nga personales basi pagtambalon ngan nahisumat nga talwas na ha kadelikaduhan an ira kahimtang.
Samtang, nagpapabilin naman nga COVID-free an munisipalidad. An pito ka tawo nga aadto han ira Quarantine Facility in nag negatibo an resulta han PCR Laboratory Test.
Ini nga pito ka tawo in tikang ha Manila ngan Cebu. Hapagkayana, mayda pa duha nga swab samples tikang ha Kananga an ginhuhulat an resulta han laboratory test. # (KEVIN SIOSANA)
