Isumat.com/Pebrero 9, 2022
Makaka-diskarel han hingyap han mga batan-on nga magin mamurayaw an Samar an pagpataya hin usa nga kagawad han Sanguniang Kabataan ha Calbayog City kakulop, Pebrero 8, 2022.
An SK Federation han Samar, SIRAK Kabataan ngan I Love Calbayog Youth Movement an nagkaka-urusa pagpahayag han ira kabido ngan mahugot nga pagkondenar han brutal nga panhitabo ha Brgy Osmena, Calbayog kun diin pinusil ngan namatay hi Brgy Migara SK Kagawad Gerald Casaljay ngan nasamad an iya mga kaupdanan.
An grupo ni Casaljay in tipa-uli na ha Brgy Migara tikang han ira pamisperas ha Brgy Osmena han gamaan hira hin waray panhikilal-i nga suspetsado. Ini nga lugar in 25 kilometros tikang ha city proper ngan aadto na ini hin kabubkiran ngan gintotoohan nga kadam-an nga may record hin krimen in naglilinook didto.
Sumala han mga grupo han batan-on, ini nga panhitabo in pagtamas-tamas han ira katungod pantawo ngan pagtanggal han ira oportunidad nga makapartisipar han mga pitad basi umuswag an kumunidad.
Ini nga krimen in pagtalumpigos han dignidad han katawhan ngan kun ano man an rason han nagpapaluyo han krimen in deri makakaghatag hin hustisya han madugo ngan insidente, sering pa han grupo.
Ira gihapon iginpa-abot an tim-os nga simpatiya ngan suporta ngadto han pamilya nga ginbayaan han biktima.
Kadungan hini an ira panawagan ha mga otoridad nga magdumara hin patas nga imbestigasyon han kaso ug ira ginhangyo an National Government nga manginlabot na han sagunson nga bayolente nga panhitabo ha Calbayog.
Ini nga mga panmatay in kinahanglan na humunong, ngan ha ngatanan nga oras maproteheran an katungod han katawhan nga mabuhi, sering pa han grupo han mga kabataan.
Ugsa hini nga panhitabo ha Brgy Osmena, mayda tulo ka tawo nga pinanmatay ha Sta Margarita Samar hadton Pebrero 6, 2022.
Dida han antis mag-pasko han 2021, tulo ka tawo an ginbulnot tikang han ira mga balay ha usa nga barangay ha Calbayog ngan pinanmusil ha kalsada tobtob han kamatay.
Nagpapadayon nga waray solusyon ini nga mga panhitabo, pero nagsumat na an PNP nga mayda duha nga suspetsado han insidente ha Sta Margarita an nagkadadakop. #
