Isumat.com/4:50AM,June 30, 2020

Ha bungto han Zumarraga, Samar, nagtikadako an obligasyon han mga barangay tanod kay labot la han ira nabatasanan nga responsibilidad ha barangay, pati na gihapon an pira nga trabaho han kapulisan ira na gihapon ginpas-an.

Ini in dara kay an bug-os nga pwersa han Zumarraga Municipal Police Office an iginpa-ilarum hin duha ka semana nga kwarentina tungod kay iginka-urusa hira hin preso nga nag positibo han COVID-19.

Nagsering hi Lt Renato Gerona, hepe han Zumarraga PNP, naka-kwarentina hiya upod an 18 nga personales didto mismo ha ira istasyon. Nakatalaan nga kuhaan hira hin swab samples yana nga semana basi igpailarum ha laboratory test.

Bumutho ini nga problema tungod kay mayda detenido ha ira karsel nga natapnan han virus. Ini amo an 50-anyos nga lalaki nga suspetsado hin panlugos ha ira bungto. Duha na ka semana an nakalabay, upat nga pulis han Zumarraga in pumakadto ha Manila basi kuha-on an suspetsado nga na-aresto didto han CIDG. Mayda niya Health Certificate tikang ha Caloocan City Health Office pero waray paghidabi kun gin swab test hiya.

Paghagos hin tulo ka adlaw tikang han ira pag-abot ha Zumarraga, ginkuhaan hin swab sample an suspetsado ngan nag positibo an resulta. Hiinungdan hini, nagdesisyon an Zumarraga PNP nga mag kwarentina hira ngatanan basi maseguro nga deri magsasarang an kagaw.

Ginklaro naman ni Gerona nga mamurayaw an ira munisipalidad ngan waray natatabo nga mga kasamok. An mga tanod in nag pahugot han pagpatrolya basi magpabilin an kahimyang han bungto. Antis pa maka-uli ini nga suspetsado, mayda na naha-una nga tulo nga taga Zumarraga an nag positibo ug tanan hira mga Locally Stranded Individuals. # (KEVIN SIOSANA)