(Image by wikipedia)

Isumat.com/8:56AM,April 28, 2020

Waray magruhaduha in usa nga barangay tanod ha Dolores, Eastern Samar nga igbalik ha gobyerno an singko mil pesos nga ayuda ha ilarum han Social Amelioration Program (SAP) yana nga panahon han COVID-19 crisis.

Sumala han impormasyon nga nakadangat ha Isumat.com, an tanod in ginkilala ngahi Jeremias Romanca, ngan residente han Brgy I han nasabi nga bungto. Hi Romanca in usa gihapon nga senior citizen.

Han makakarawat hiya han ayuda pinansyal, nag boluntaryo hiya pagbalik han kwarta ngadto han munsipyo. Iya ginklaro nga deri hiya kwalipikado paka-agom han ayuda tungod kay an iya ginang-maybahay in retirado nga maestra ngan mayda binulan nga pension tikang ha gobyerno.

Hi Romanca in usa la han nagtitikadamo nga mga Pilipino nga nag-uuli han SAP assistance kay deri hira kwalipikado o nag dodoble na an ira nakakarawat.

Usa na gihapon denhi an 4Ps member nga hi Erlinda Dalina han Arteche, E. Samar nga igin-uli gihapon ha DSWD an 5 mil pesos nga SAP kay mayda man hiya ayuda pinaagi han 4Ps.

An mga 4Ps beneficiaries ha Brgy Sua, Daram, Samar in nag-aragmot naman basi igpalit hin relief goods nga ira iginhatag ha mga ka-barangay nga waray makakatagamtam hin bulig. #