Isumat.com/Setyembre 3, 2021

Tungod nga waray akseptara han babaye nga ginhahalaran han iya paghigugma, gintiwasan hin usa nga Barangay tanod ha Tabango, Leyte an iya kalugaringon kinabuhi.

Dida han imbestigasyon han kapulisan, ginkilala an biktima nga hi Hilario Salino, 52 anyos, tanod ngan residente han Brgy Manlawaan, Tabango. Natabo an insidente hadton kulop han Agosto 31, 2021.

Nagsumat an umangkon han biktima ngahi Romeo Salino nga hadto nga takna nagtatagay-tagay hiya ngan han iya sangkay han umabot an iya tiyo Hilario. Ginkumbida nira Romeo an biktima nga humampang ha ira pero waray uminom ngan nagsering nga malakat hiya ngadto hin iba nga barangay.

Na-obserbaran nira Romeo nga masulob-on an pamahong-pahong ni Hilario. Kataliwan hini, lumingkod ha tuna an biktima ngan bumunlot hin pistola ug pinusil an too nga parte han iya ulo hinungdan han iya kamatay.

Subay pa han report, antis pa insidente, an biktima in nag-aantos na hin duro nga kabido-an kay waray daw hiya karuyaga han babaye nga iya gin-ooyaban. An kapulisan in nakakuha hin litrato hin babaye sapit han patay nga lawas ni Hilario. Gintutuohan nga amo ini an babaye nga ginpapangonsuylohan ni Hilario.

Nakuha gihapon dida han crime scene in kalibre 45, lima nga bala ngan usa nga basiyo hin bala.

An patay nga lawas in gindara ha Tabango RHU para han Post-Mortem Examination. #