Isumat.com/7:29AM, Marso 16, 2021

Tumalikod ha kadayunan in usa nga barangay kapitan han malumos hiya ha kadagatan didto ha San Roque, Northern Samar, Marso 15, 2021.

Subay han inisyal nga imbestigasyon, an biktima ginkilala nga hi Daniel Sallave in nagbabaktas la ha ligid han baybayon ha Brgy Bantayan han nasabi nga bungto han tigda nga dagmalan hiya hin dagko nga mga balod. An biktima in nadara han makusog nga pwersa han balud tibalik ngadto han kadagatan.

Paghagos hin pira ka oras, natad-an an lawas han biktima nga naputos na han iya dara-dara nga pukot han matabo an insidente. Gindara an biktima ha Rural health Unit pero gindeklarar han doktor nga dead on arrival.

An 55-anyos nga hi Sallave amo in residente ngan kapitan han Brgy Genagdanan han mao nga munisipalidad.

Ha iba naman nga panhitabo, gin-iimbestigar pa yana han mga otoridad an rason han gin-aalegar nga pagpakamatay pinaagi hin paq-inom hin insecticide hin usa nga lalaki ha Southern Leyte hadin Marso 14, 2021.

Ginkilala an biktima nga hi Aristeo Isog, 41 anyos, may asawa ngan residente han Brgy District III, Hinundayan, Southern Leyte.

Sumala han mga imbestigador, an anak han biktima nga hi Vincent in nakakita han iya tatay Aristeo nga uminom hin insecticide. Kadagmitan nga gin-agaw ni Vincent an botelya han insect killer pero naka-inom na an iya amay.

Ha gilayon nga takna, gindara ha hospital hi Aristeo pero nagsering an doktor nga patay na an biktima pag-abot ha hospital.

An anak nga hi Vincent in gintatambal yana ha hospital tungod kay natapsikan an iya baba ngan nawong han insecticide. #