(File illustration by The India Times)

Isumat.com/7:47AM, Pebrero 15, 2021

Imbes nga pagpahalibway ngan kalipayan an aabaton tungod han pagsa-urog han Valentine’s Day, nagin kunsumisyon ini nga adlaw para hin usa nga kapitan del barangay ha Kawayan, Biliran.

Ini in tungod kay nawad-an hiya hin porlomenos 400 Mil pesos nga cash nga iya ginbayaan ha sulod han iya sarakyan samtang hiya in nakadto hin resort ha sapit nga bungto han Almeria.

Dida han notisya han Biliran Island.com, an biktima amo hi Atty. Manolo Rubi, Barangay Kapitan han Poblacion Kawayan. An 71-anyos nga abogado ug an iya kaupdanan in pumakadto ha Paradizu Bayview Resort hadton Pebrero 13 ngan nag-check-in para hin usa ka adlaw nga pag-istar didto han resort.

Sumala pa han balita, iya iginbilin ha iya Ford Raptor Pick-up an nasabi nga kwarta upod na gihapon in kadam-an nga dokumento. Hadto nga takna, waray pa niya kasabti nga nakalimtan ngay-an niya pag-lock an portahan ha wala nga parte han luyo nga lingkuranan ngan abri pa gud an windshield han portahan.

Pagkabuwas, Pebrero 14, alas 7 han aga, pumakadto hi Rubi han iya sarakyan ngan didto na niya nadiskubre nga naanaw na an salapi nga iya iginsulod ha pitaka ngan belt bag.

Ini nga panhitabo in iya iginreport ha Almeria PNP nga naghihimo na yana hin imbestigasyon basi matudlok an suspetsado o mga suspetsado. #