Isumat.com/Abril 30, 2021
Usa na liwat nga opisyal hin barangay nga nalalambigit ha iligal nga droga an na-aresto han mga otoridad ug ini nga operasyon in natabo ha Palo, Leyte hadin nag-agi nga adlaw.
Ginkilala an suspetsado nga hi Arnel Fundeva, 48 anyos, residente ngan kagawad han Brgy Cavite East, Palo. Hiya in lakip han mga High Value Individual Personality han droga dida han nasabi nga bungto.
An mga otoridad in syahan nakapalit hin usa ka sachet hin gin-aalegar nga shabu ngan nakuha tikang han suspetsado in kadugangan nga lima ka sachet. An kagawad in preso yana ha Palo Police Station ngan maatubang han kaso nga iginsalawad kontra ha iya.
Samtang, naka-eskapo naman an usa nga drug suspect samtang nagdudumara hin buy-bust an mga kapulisan ha Tacloban City. An suspetsado in ginkilala nga hi Ernest Almaden, 51 anyos, residente han Brgy 36-A.
An mga otoridad in nakapalit hin duha ka sachet hin droga tikang han suspetsado balor hin 10 Mil pesos. Dida han katapos magbalyu-ay han salapi ngan droga, naka-abat hi Almaden nga mga pulis an iya ka-transaksyon.
Sumala han report, mabulnot na unta hin pusil hi Almaden, pero naha-una an kapulisan pagbunlot sanglit tigda nga kumarida an suspetsado. Ginpabuthan han mga pulis an suspetsado pero waray ini maigo. Nadara han suspetsado an buy-bust money.
Hapagkayana, nagbubuhat hin operasyon an mga tinubyanan han balaud basi ma-aresto hi Almaden. #
