Isumat.com/8:45AM, July 25, 2020
Patay an usa nga anay kaapi han PNP han pusilon hiya hin waray pa hikilal-I nga suspetsado kanina han alas 6:45 han aga ha Maharlika Highway, Brgy Abucay, Tacloban City, atubangan han Our Lady of Guadalupe Church.
Subay han inisyal nga impormasyon nga nahikay han Isumat.com, an biktima in ginkilala nga hi Francisco Homeres Jr, may igo nga pangidaron ngan residente han nasabi nga lugar.
Hi Homeres in retirado nga PNP Personnel ug an iya katapusan nga destino in ha CIDG.
Iginmalatumat han mga testigos nga mayda umagi nga van dida han lugar ngan ginpusil hin pira ka beses an biktima ug naigo ini ha ulo.
Dida han pahayag ni Brgy Captain Ricardo Benitez, iya pa iginkasugat an biktima samtang nagdya-jogging ini kanina han aga. An biktima in mapalit unta hin pagkaon dida han carenderia ha ligid han highway han pusilon hiya han suspetsado nga kadagmitan kumalagiw sakay han van.
Nagpahayag pa hi Benitez nga waray niya nasasabutan nga kaaway o iginkabalingkutay ni Homeres dida han ira barangay.
Iginpapadayon pa han mga otoridad an imbestigasyon han nasabi nga krimen. # (w/ reports from Noel Sianosa and Leo Lledo)
