Isumat.com/Enero 10, 2023

An syudad han Borongan ha Eastern Samar an naka-eksperiensya han gihahataasi nga rainfall volume han nag-agi nga lima ka adlaw ha bug-os nga Visayas, sumala han Philippine Atmospheric Geophysical and Astronomical Services Administration (Pagasa).

Dida han monitoring han ahensya, an Borongan City in nagkaada hin 249.5 millimeters total rainfall han nakalabay nga lima ka adlaw.

Ginsundan ini han Guiuan, Eastern Samar (135.2 mm); Catarman, N. Samar (134.2 mm); Catbalogan City, Samar (95.8 mm) ngan Tacloban City (94.3 mm).

Ini nga mga pag-uuran in nagdurot hin pagbabaha ngan mga landslides ha bug-os nga Rehiyon Otso. Kadam-an gihapon nga LGUs an nagsuspender han trabaho ngan klase ha ira lugar.

Ginbabanabana nga tobtob pa hiton Biernes nga adlaw an pag-uuran tungod han haluag nga sirkulasyon han dampog han Low Pressure Area ha Sur nga dapit han Mindanao.

Tungod han maraot nga kahimtang han panahon, waray maka-landing ha Borongan City Airport an eroplano han Philippine Airlines kakulop, Enero 9, 2023. Amo ini an ruta nga Manila-Cebu-Tacloban.

Igin-divert an ruta para han katalwasan han mga pasahero ngan tumugpa ini ha Tacloban City Airport.

Kadagmitan naman an nagin aksyon han LGU-Borongan pinaagi han pagpabiyahe han ira coaster ngan ginkuha an mga pasaheros han mao nga eroplano ha Tacloban Airport ngan igindul-ong ha ira mga destinasyon ha Borongan ngan iba nga parte han Eastern Samar.

An mga pasaheros in nagpabati hin pagpasalamat ha Makagarahum ngan LGU-Borongan han talwas nga ira paka-uli ngan kaangayan nga aksyon han LGU. #