Photo grab from Idol in Action/TV 5.

Isumat.com/Abril 28, 2021

Usa nga Kapitan del Barangay ha Ormoc City in nagreklamo ha programa nga Idol in Action ni Raffy Tulfo kay gin-blackmal daw hiya hin usa nga lalaki nga nagpasarang hin mga litrato nga naghaharukay hira ngan litrato han ikinatawo ni Kap.

An tagreklamo amo hi Nenito Anonat, inasaw-an ngan Chairman han Brgy Don Felipe Larrazabal, Ormoc City. An iginrereklamo hi Melvin Mabansag, nga nagtrabaho komo mason ha balay ni Kap. Hi Melvin in iginsumat nga nagtatrabaho yana ha Saudi Arabia.

Sumala kan Anonat, nagpadangat hin mensahe ha iya hi Mabansag nga igpapasarang niya an litrato nga naghaharukay hira ug an litrato han “pikoy” ni Kap kun deri ihatag an iya mga karuyag. Pati an misis ni Kap in ginpadad-an han mga litrato, sanglit nagkaada na hin problema an mag-asawa.

Igin-istorya ni Kap nga hadton 2019 iya ginkuha nga mason hi Mabansag dida han pag-ayad han iya balay ngan nagkasangkay hira. Nagtagay-tagay hira ngan gin “set-up” hiya ni Mabansag basi makuhaan hin picture nga naghaharukay hira. Waray gihapon salabutan hi Kap nga ginpiktyuran ni Mabansag an iya pikoy.

Igindig-on ni Kap nga deri hiya bayot. Nalipat la hiya hadto nga takna dara han impluwensya han alkohol. Bisan an misis ni Kap in nagsering nga syahan pala adto nga nahitabo. Sering pa ni misis, nag text hi Mabansag ha iya nga bubulagan hiya ni Kap.

Nag-insister hi Kap nga hi Melvin an nagmani-obra hin pagharok ha iya. Nagtatahap hi Anonat nga mayda tabletas nga iginbutang hi Melvin han ira gin-iinom basi maglipong an iya ulo. Ginklaro pa niya nga waray nira relasyon ngan tumapod la hiya kay ha iya paghunahuna tuhay an batasan ni Melvin.

Andam naman hi Kap magsampa hin kaso kontra kan Melvin samtang hi Tulfo in nagpatapod nga mabulig hiya basi mahi-deport hi Mabansag tikang ha Saudi. #