May COVID-19 nga makamaratay ha tawo, African Swine Flu o ASF nga nakakadarahig han industriya han baboy, ngan yana sugad sugad nga bumalik an bird flu ha aton nasud.
Kanina han aga, Marso 16, hi Agriculture Secretary William Dar in nagbuyagyag nga may nadiskubre nga pagbutho han H5N6 avian influenza o bird flu. Kun ha aton pa tinatawag ini nga tokwaw.
Kun manunumduman, na-apektaran an poultry industry ha aton nasud hini nga sakit hadton 2018, ngan yana mayda natabo nga parehas hini ha usa nga quail farm o umhanan kun diin ginbubuhi an pogo ha Brgy. Ulanin-pitak, Jaen, Nueva Ecija.
Nagsering hi Dar nga nag positibo ha bird flu an mga samples nga gin testingan tikang ha nasabi nga quail farm hadton Marso 13. Nagdumara hira hin testing han sobra usa ka yukot nga pogo an namatay. Dara hini, gintuyo nala han mga veterinaryo nga patayon an sobra dose mil nga mga pogo nga nasasalin basi deri na maglarab an kagaw.
Hapagkayana, an Agriculture Department in naghihimo hin mga pitad basi kabalabgan an pagsarang hini ha iba pa nga poultry han nasabi nga lugar.
An World Health Organization in nagpahayag nga waray pa hira nakakarawat nga mga report yana nga tuig kasumpay hin mga tawo nga natapnan hini nga sakit tikang ha manok, pabo o tamsi. Pero tikang han 2014 tobtob 2019, mayda record an WHO hin 24 katawo nga natapnan hini nga bird flu didto ha China. #
