(Image by boholchronicle.com.ph)

Isumat.com/6:53PM, June 4, 2020

Depression, personal nga mga problema ngan duro nga kabido-an tungod han paghigugma an mga rason han pagpakamatay han 28-anyos nga estudyante ha Visayas State University ha Baybay City, Leyte.

Ini an iginsumat han pamilya han biktima ngahi Jeanji Oquias han igkahimangraw hira han mga opisyales han unibersidad nga pumakadto ha ira panimalay yana nga kulop.

Kagab-i han pasado alas 7 an oras, natad-an hi Jeanji nga naghikog pinaagi han pagbitay han iya kalugaringon ha usa nga kahoy ha tay-aw nga lugar han Brgy Gabas.

Iginsaysay han pamilya Oquias nga tikang pa han Mayo 15 na-obserbaran nira nga deri na namumutang hi Jeanji ngan bagabaga hin pirmi masulob-on. Hinsabutan nga nagsumat hi Jeanji ha iya patod nga nagkabulag hira ngan han iya oyab.

Kakulop han alas 4 han kulop, nagsering an biktima han iya nanay nga magpapakamatay hiya ngan tigda gumawas han balay ngan waray na kitaa.  Dumuroy an kabaraka han pamilya han madiskubre nira nga nagdara hin pisi hi Jeanji han paglakat hini.

Sobra hin tulo ka oras nga ira ginpinamiling an ulitawo ngan ira nala nakita nga nabitay na an biktima ha usa nga puno. Kadagmitan ira gindara an biktima ha Western Leyte Provincial Hospital pero igindeklarar han mga doctor nga Dead on Arrival hi Jeanjie.

Sumala han report han Amaranth-VSU, hi Jeanji in manunumduman nga malipayon, mabinuligon ngan bootan nga lalaki. Nagtrabaho hiya ha Manila ha usa nga pribado nga kompaniya, pero nagdesisyon pagbalik ha Baybay City basi igpadayon an iya pag-eskwela kay waray na bayad an tuition.

Iginmalatumat pa han report nga deri problema ha iya pag-eskwela an hinungdan han iya paghikog.

Hiya in 3rd year agriculture student ha takna han iya kamatay.

Nakatalaan nga iglubong an patay nga lawas ni Jeanji hiton Lunes, Hunyo 8, 2020.

An VSU ug an Supreme Student Council in naghatag hin ayuda pinansyal ha pamilya han biktima. # (KEVIN SIOSANA)