Baha ha Jipapad, Eastern Samar (Photo by Jhoy-cee Beer)

Isumat.com/7:03AM, Abril 20, 2021

Bisan kun waray derekta nga dagmal an Bagyo Besing ha Sinirangan Bisayas, nagin hinungdan la gihapon ini hin kaawat hin kinabuhi, distroso ha mga infrastraktura ngan pangibakwit hin kadam-an nga mulopyo han rehiyon.

Iginreport nga usa nga lalaki an namatay ha St Bernard, Southern Leyte han madat-ugan hiya hin napukdol nga lubi. Gintalinguha pa han mga rescuers nga masalbar an biktima pero grabe an karamtan ha iya lawas hinungdan han iya pagtalikod ha kadayunan.

Ha Northern Samar, porlomenos 1,783 ka tawo an temporaryo nga nagbalhin ha mga evacuation centers, samtang mayda naman haros 1,500 nga indibiduwal ha Eastern Samar an nan-ibakwit.

Nahireport gihapon nga mayda guba an national highway nga nagkokonektar han bungto han Arteche, Eastern Samar ha Lapinig, Northern Samar. Nagbabaha naman an kadam-an nga parte ha Palapag, Northern Samar ngan Jipapad, Eastern Samar.

Ha Tacloban City, pira gihapon nga pamilya ha Anibong, Cabalawan, Abucay ngan San Jose an ginpalis-ig ngadto hin mas talwas nga lugar.

Kadam-an nga parte han rehiyon in nag-antos hin kawaray kuryente tungod han mga guba ha transmission lines. Pero kakulop, Abril 19, nagpahayag an National Grid Corporation of the Philippines nga haros 100 porsyento na han Eastern Visayas an nahibalik an elektrisidad.

Maabot naman hin 900 nga pasaheros an na-stranded ha mga pantalan ha Allen, Northern Samar ngan Lilo-an, Southern Leyte tungod kay waray tuguti han Philippine Coast Guard nga makabiyahe an mga barko.

Ha Ormoc City, an LGU han syudad in nanhatag hin pagkaon ngadto han mga pasaheros tikang ha Samar ngan paghagrani nga mga bungto nga na-stranded ha terminal katapos la nga temporaryo undangon an mga biyahe han bus ngan barko.

Haros ngatanan han mga LGUs han rehiyon an nagdeklarar hin suspensyon han trabaho ngan klase dida han Lunes basi kalikyan han katawhan an posible nga peligro durot ni Besing.

Gin-isa an Signal Number 2 ngan Number 1 ha mga parte han Rehiyon Otso dida han Sabado tobtob Lunes tungod han tarhog han bagyo. #