Isumat.com/2:09PM, May 20, 2020

Usa nga babaye an namatay samtang duha pa nga iba an nagkasasamdan dida hin magkalain nga insidente hin panmuno ha Southern Leyte.

Ha bungto han Sogod, namatay hi Angel Fernandez, 31 anyos han pagbunobuno-on hiya han suspetsado ngahi Olimpio Lucanas, 60 anyos, dida han Lunes, Mayo 18, 2020.

Nagpapakita an imbestigasyon nga nag-away hi Fernandez ug hi Lucanas. Han mapungot an suspetsado, binmunlot ini hin kutsilyo ngan upat ka beses nga ginbuno  an biktima. Dead on arrivael an biktima han pagdad-on hiya ha hospital.

Na-aresto naman an suspetsado ngan preso yana ha Sogod PNP Station.

Didto naman ha Maasin City, an malipayon nga tagay-tagay nahingadto hin aragway nga nagin hinungdan han kabuno hin duha ka tawo.

An mga biktima in ginkilala ngahira Russel Calapre, 33 anyos, taga Brgy Mantahan, ngan hi Daniel Galeon, 43 anyos, residente han Brgy Combado. An suspetsado in ginkilala ngahi Eric Mendoza, 49 anyos.

Sumala han record han police, an mga biktima ug an suspetsado in nagtatagay-tagay ngan paghagos hin pira ka oras nga alsa-baso, nagkabalingkutay ngan nagin mapaso na an argumento nga nagdalan na hin aragway. Hi Mendoza in nakakuha hin kutsilyo ngan ginpanmumuno an iya mga kahampang.

Hi Calapre in nasamad ha tiyan, samtang hi Galeon in nag-antos hin kasamdan ha paa. Nagpapatambal yana ha hospital an duha nga biktima.

Nagpruweba pa an suspetsado hin pag-eskapo pero nakwelyuhan gihapon hiya han kapulisan ngan narekupo an armas nga gingamit han krimen. Hapagkayana, preso an suspetsado ngan nakatalaan umatubang han kaso nga igsasampa kontra ha iya. # (KEVIN SIOSANA)