Isumat.com/10:58AM, Pebrero 5, 2021
Nakasulod na an kagaw han African Swine Flu (ASF) ha bungto han Tanauan, Leyte subay han gibabag-uhi nga update tikang ha Dept of Agriculture Regional Office yana nga aga (Pebrero 5).
Iginpahayag ni DA Regional Executive Director Angel Enriquez, nakumpirmar han ira ahensya nga mayda nadarahigan han ASF nga baboy ha Brgy Bislig han nasabi nga bungto. Dara hini, magkakaada yana hin kadagmitan nga hiruhimangraw an mga tinaglawas han DA ngan LGU-Tanauan para han bubuhaton nga mga pitad kasumpay hini nga isyu.
An Tanauan an ika-lima nga munisipalidad han probinsya nga na-alakbatan han virus nga nakakamatay han baboy. Naha-una nga nagkatatapnan an mga baboy didto ha Abuyog, La Paz, Javier ngan Dulag.
Kakulop (Pebrero 4) an LGU-Palo in nag-implementar hin usa ka semana nga waray pangihaw ngan pagbaligya hin baboy ha ira bungto samtang gin-iimbestigar an hinungdan han kamatay hin baboy ha Brgy Salvacion.
Gintutudlok nga rason an ASF han paghinitaas han presyo han baboy tungod han pagkulang hin suplay kay damo na nga mga lugar ha Luzon, Mindanao ngan pira nga parte han Visayas an apektado han virus. #
