Isumat.com/8:42AM, Enero 30, 2021

Katapos hin 15-anyos nga pagdiskanso tikang ha showbusiness, mabalik han iya naha-una nga kalibutan hi anay Tacloban City Mayor Cristina Gonzales-Romualdez.

Dida han report nga nahikay han Isumat.com, hi Kring-Kring in nagpirma pala hin kontrata ha Viva Artists Agency para han iya showbiz comeback.

Nagsering hi Cristina nga nga iya na napruwebahan in damo nga obligasyon sugad han pagigin pulitiko, nanay, negosyante ngan artista ngan karuyag niya umutro han kinabuhi ha showbiz.

Nagin City Councilor ha Tacloban hi Cristina hin tulo ka termino ngan nagin alkalde gihapon han syudad. Hiya in may duha nga anak nga babaye kan incumbent Mayor Alfred Romualdez.

Katapos niya magin opisyal han syudad, bumalik hiya ha Manila para han iya mga negosyo.

Iginsumat niya nga an iya kakarawaton yana nga mga papel ha pelikula deri na parehas hadto kay iba na yana an kahimtang ngan nadugangan na an iya edad. An actress in 50-anyos na yana.

Andam gihapon hiya makigpadis hin barubata ha iya mga aktor ha pelikula. Partikular nga iya gin ngaranan hira Xian Lim ngan Marco Gumabao.

Hadto nga mga panahon, hi Cristina in iginka-upod na ha pelikula hira Robin Padilla, Cesar Montano, Aga Mulach, Ian Veneracion ngan kadam-an pa nga iba. #