Isumat.com/7:54AM, Marso 4, 2021
An pagkaharampang ha atubangan han grasya in nahingadto hin makangingirhat nga trahedya han pagbunobuno-on ngan mamatay in usa nga anay konsehal han Babatngon, Leyte hadin nakalabay nga adlaw.
Subay han report han kapulisan, an biktima in ginkilala nga hi Lucas Codilan Sr, 77-anyos, residente han Brgy Malibago, Babatngon. Hiya in nagin konsehal han bungto tikang han 2007 tobtob 2013.
Dida han imbestigasyon, hi Codilan Sr, in nakaon hadto nga takna ha iya panimalay ngan kahampang niya an iya anak ngan umagad. An suspetsado ginkilala nga hi Sofronio Birong alias Ponyong, 59-anyos, taga Brgy District 1, in sumulong ngadto han balay han biktima.
Pag-abri pala han portahan ginbuno dayon ni Birong hi Codilan pero nakalikay anay an biktima. Nagpruweba pa hin pagdalagan hi Codilan pero naabtan han suspetsado han matumba hiya ngan dida hini ginpanmumuno ni Birong an biktima.
Hi Codilan in namatay dida han lugar han krimen, samtang hi Birong in nagmalahimo hin pag-eskapo pero paghagos hin pira ka oras nasikmit hiya han mga kapulisan.
Tobtob han ginsusurat ini nga notisya, waray pa pahayag tikang han mga imbestigador kun ano an motibo ni Birong nga nakapaslak na ha karsel. #
