An ka mahal na han pag baligya han kunyente han mga generation company amo an rason han pag dako han electric bill han mga tag kunsumo han kuryente deri la ha rehiyon otso kundi ha bug-os nga Pilipinas ngan deri ini pag burut-an han mga Electric Cooperatives.
Ini an pag klaro ni Allan Laniba General Manager han LEYECO 3 ngan presidente han National Association of General Managers of Electric Cooperatives (NAGMEC) ha interview han isumat.com.
Sumala kan Laniba nga na tag desi nueve pesos na kada kilowatt hour an binabayaran han mga tag kunsumo han kuryente ha ilarom han Southern Leyte Electric Cooperative (SOLECO) ngan tag sobra desi otso pesos naman an sakop han LEYECO 3 ngan LEYECO 4 samtang an pinaka ha bubo amo an LEYECO 2 nga nag sasakop han siyudad han Tacloban Palo ngan Babatngon Leyte nga na tag onse pesos la.
An Rason, mahitungod han pag hataas han balor han dolyar kontra han peso nga naka apekto han presyo han kuryente mahitungod kay an generation company nga amo an kinukuhaan han kuryente han haros ngatanan nga mga electric cooperatives ha rehiyon nga amo an GN Power ha Mariveles Bataan in na gamit hin “Coal” nga imported pa ha iba nga nasud sugad panaglitan han Indonesia.
Gin sumat pa ni Laniba nga dida han pag dumaraon an bidding kon hin-o an ma supply hin kuryente ha mga electric cooperatives pira na ka tuig an nag labay an GN Power an nag daug mahitungod nga amo ini an may pinaka barato nga presyo nga na tag tres pesos ngan beinte otso sentimos la kada kilowatt hour pero an balor han dolyar hadto nga mga panahon in mga kwarenta pesos pala kada usa ka dolyar samtang yana ini in tag singkwenta y sais pesos na kada dolyar.
Mahitungod nga dolyar man an ginagamit pag palit han “Coal” amo ini nga apektado an presyo han pag baligya han kuryente dugangan pa han gulpi nga buwis nga gin papatong han gobyerno tikang han pagpalit han kuyente ha mga generation companies, an aagian han kuryente pinaagi han National Grid Corporation of the Philippines san-o an kuryente maka abot ha mga panimalay.
Mahitungod hini nag kaada hin energy summit pira pala ka adlaw an nag labay nga gin partisiparan han mga opisyales han mga asosasyon han mga tag kunsumo hin kuryente ha rehiyon otso agud pag irostoryahan kon ano an maupay nga pag bubuhaton mahitungod hini nga sitwasyon ngan agud panginanuon liwat kon waray ba pag abuso han pan mresyo han kuryente han mga supplier.
Mag papadara han ira position Paper an mao nga hugpo ngadto ha Energy Regulatory Commission (ERC) agud panginanuon ini nga mga bagay agud ma proteheran an intereshan mga tag kunsumo han Kuryente.
Gin klaro pa ni Laniba nga sobra dos pesos la iton para ha mga electric cooperatives dida hiton na tag desi otso pesos na yana kada kilowatt hour nga presyo hiton kuryente ngan igo la hira nga nanunukot hini ngan gin babayad liwat it dako nga porsyento hini ngadto han mga supplier han kuryente,ha NGCP ngan ha gobyerno.
Hingyap han mga electric cooperatives nga panginanuon ini nga isyu hiton administrasyon ni Presidente Ferdinand Marcos mahitungod kay apektado iton ngatanan nga mga pilipino labi na nga haros ngatanan na nga lugar han pilipinas in mayda na mga kuryente sumala pa kan Laniba.
