Isumat.com/Mayo 25, 2021
Igindeklarar han pamunuan han Eastern Samar nga igpailarum ha State of Calamity an probinsya tungod han pakasulod ngadto han African Swine Fever (ASF).
Dida han report han Philippine Information Agency (PIA-8) nahimugso ini nga pitad tungod han kumpirmasyon han Provincial Veterinary Office nga mayda na nagkatatapnan nga baboy ha Dolores ngan mayda mga kababuyan ha pira nga bungto nga ginsususpetsaran nga natapnan gihapon han kagaw.
Hi Dr. Norma Ylanan, an Provincial Veterinarian. an nagpahayag nga sobra 400 nga kababuyan ha Dolores in boluntaryo nga panmamatayon dara han ka-alakbati han ASF ngan kabalabgan an padayon nga paglarab hini.
An LGU-Oras in naghangyo liwat ha Provincial Government nga panginano-on in pira nga kababuyan ha Brgy Balocawe tungod han pagtahap nga natapnan na ini.
Hi Gobernador Ben Evardone in nagmando dayon ha Provincial Veterinary Office nga buligan an Oras Agriculturist Office basi katagan hin atensyon ini nga isyu.
Igin-report pa ni Ylanan nga naghimo gihapon hira hin inspection ha Brgy Sulangan, Guiuan, pero negatibo an resulta han laboratory test.
Syahan nga nakatapon an ASF ha Abuyog, Leyte ngan nagsarang ha sobra napulo nga bungto han lalawigan. Katapos hini, nahipatik an mga kaso hin ASF ha Silvino Lubos, Northern Samar; sugad man ha Calbayog City ngan Catbalogan City ha Samar.
An ASF in usa nga klase hin kagaw nga nakakamatay han baboy ngan nadadarihigan an industriya ngan pakabuhi han babuyan. Ini nga kagaw in deri nakakatapon ha tawo. #
