Isumat.com/8:40AM, June 18, 2020
“Igpadayon an aton panlimbasog para han kamurayawan ngan pagsupil han insureksyon, sugad man pag-ayuda kontra han COVID-19. “
Ini an nagin unod han mensahe ni AFP Chief of Staff General Felimon Santos para han mga opisyales ngan kasundaluhan han 8th Infantry Division. Hi Santos in pumasyada kakulop ha Camp Lucban, Catbalogan City basi manginano han mga tropa han gobyerno nga kaapi han Stormtroopers.
Nagpasalamat gihapon hi Santos han mga Stormtroopers dara han darayawon nga ira nahimo kontra han rebelde nga mga kumunista . Iya pa gin-awhag an mga kasundaluhan nga pirmi magka-urusa ngan igmentenar an kredibilidad. Ha ngaran han liderato han pwersa armada han nasud, mapaso niya nga ginlamano an mga sundalo dara han ira maupay nga binuhatan.
Kaupod ni Santos han iya pagbisita hira LtGen Roberto Ancan, Commander han Central Visayas Coomand; MajGeneral Ernesto Torres, Commander han AFP-Civil Relations Serrrvice; ngan iba pa nga higtaas nga opisyal han AFP.
An 8th ID in ginpangunahan naman ni Commanding General Pio Dinoso.
Ha luyo han mga natatabo nga engkwentro han AFP ngan mga rebelde nga NPA, an pwersa armada han Pilipinas in nagpapadayon han ira panawagan ha mga rebelde nga bumalik na ha piyod han balaud ngan makatagamtam han mga programa han gobyerno para han mamurayaw nga kinabuhi. #
