(Photo by Balita Aksyon Solusyon(

Isumat.com/Marso 16, 2022

Maatubang hin kaso kasumpay han pagbaligya hin iligal nga droga an nangungulo han Liga ng mga Barangay ha Matalom, Leyte.

Ini in katapos la madakpan an nasabi nga Barangay Chairman ginkilala nga hi Rogelio Dano, 53 anyos, alias Elmer. Hiya an kapitan han Brgy Sta Fe ngan ABC President han mao nga bungto.

Nadakop gihapon dida han buy-bust an iya kaupod nga hi Cesario Lambujon, 35 anyos ngan residente han nasabi nga barangay.

Na-aresto hira Dano ngan Lambujan dida han operasyon han mga personales han Bato ngan Matalom PNP Stations. An operasyon in gindumara pasado alas 7 han gab-i, Marso 15, 2022 ha Baywalk Area han Bato, Leyte.

Ginkokonsiderar han mga otoridad nga High Value Target an nasabi nga barangay kapitan.

Dida han pag-alinsusunod han Isumat.com han naglabay nga panhitabo kan Dano, nasabtan nga hadton Abril 11, 2019, an iya balay ha Matalom in ginpa-arakan hin bala hin waray panhikilal-i nga mga suspetsado.

Nadanyos an sliding door han ira balay sugad man an ira sarakyan nga nakaparada nga nagka-iigo hin punglo.

Waray naman nasamad o naawat an kinabuhi nga tawo dida han insidente. Tobtob yana, waray na impormasyon kun ano an natabo han nasabi nga insidente. # (with reports from Balita Aksyon Solusyon and Sunstar)