TACLOBAN CITY – Padayun an pagdumara hin forced evacuation han Ormoc Local Government Unit ha mga residente han Lake Danao.
Ini in mahuman nga igpresenta ng PHIVOLCS kan Ormoc City Mayor Richard Gomez ngan ha mga cabinet secretaries ha meeting nira han una han nakalabay nga semana nga kun diin gindeklara nga prone an mao nga lugar ha multiple hazards sugad nala han landslide, rockslide, floodslid ngan liquifaction.
Pero mayda la gihapon pira nga mga residente nga nagmamadig-on nga diri bayaan an ira mga pakabuhi ngan panimalay.
Nabaruan nga mayda gihapon mga residente ha Lake Danao an temporaryo nga ginpanbakwit harani ha mga lugar sugad nala han barangay han Dolores, Luna, ngan San Pablo samtang waray pa permanente nga relocation sites nga maihahatag an Ormoc LGU.
Samtang pira naman nga evacuees ha campsite han Brgy. Cabaon-an in nakakaeksperyensya hin pagkasakit sugad nala han ubo, sipon ngan hiranat tungod han napaka-hagkot nga temperatura labi pa kun kada gab-e labi pa kaurugan hanira in temporaryo nga naukoy ha mga tents.
