Isumat.com/8:03AM, July 11, 2020

Haros ngatanan Locally Stranded Individuals (LSI) an nahidugang nga mga kaso han COVID-19 ha Eastern Visayas. Dida han bag-o nga 11 nga Positive Cases, napulo ha ira an mga LSI. Ini in subay han report kakulop (Hulyo 10) han DOH Regional Office.

An bungto han Barugo, Leyte in tulo nga pasyente an nahidugang. Duha an LSI ug usa an natapnan hin naha-una nga nagpositibo. An duha nga LSI in kalalakin-an nga tikang ha Cebu ngan Paranaque, samtang an ikatulo in 38-anyos nga babaye nga amo an nagbantay ha hospital han naha-una nga nagpositibo nga residente han bungto.

Tulo gihapon nga kaso an nahidugang ha Naval, Biliran ug tanan LSI nga na-stranded ha Cebu, samtang an bag-o nga duha nga kaso ha Almeria in tikang gihapon ha Cebu. Ha Biliran, Biliran, an duha nga bag-o nga kaso in tikang ha Taclcoban ngan Cavite. Dida han bug-os nga Biliran Province, 25 na an natapnan ngan napulo an naka-recover.

Nahipatik naman an gisasyahani nga COVID Patient ha Guiuan, Eastern Samar. Usa hiya nga LSI tikang ha San Mateo, Rizal nga umabot ngadto ha Guiuan hadton Hunyo 22 ngan deretso gin-kwarentina. Sumala han LGU-Guiuan, makokonsiderar nga nakatalwas na han virus an pasyente kay 19 na ka adlaw an iya kwarentina.

625 na katawo an natapnan han kagaw ha Region 8 ngan 520 o 83 porsyento an nakatalwas tikang han infection.

Iginpasamwak gihapon han DOH nga an mga syudad han Tacloban, Ormoc ngan Baybay in COVID-Free hapagkayana.

An DOH ug an mga LGUs in nangangandaman yana han pagka-abot na liwat han mga LSI tikang ha iba nga lugar kataliwan han duha ka semana nga temporaryo pagpa-undang han ira pagkabalik. #