Mahugot na yana an pangandaman han LGU-Catarman, Northern Samar para han nakatalaan nga pag-uli hin kadam-an nga mga mulopyo han bungto tikang ha Metro Manila.

Sumala han report han Catarman Municipal Information Office, maabot na hin 700 ka tawo an nagpa lista nga mabalik ha ira bungto kun tugutan na hira nga makabyahe.

Labot la han tikang ha Manila, sobra 20 nga mga Catarmananon ha Cebu an nagparehistro nga mauli na gihapon. Mayda liwat mga OFWs an nagpahayag nga mauli ha ira munisipalidad.

An Catarman Inter-Agency Task Force in nakikigsumapayan na yana ha mga grupo ngan ahensya kasumpay han mga facilidadis nga puede himoon nga Isolation Units kun diin temporaryo nga mag-uukoy an mga magkakabalik para han 14-dias nga kwarentina antis umuli ha ira tagsatagsa nga panimalay.

Upod dida han posible himoon nga Isolation Wards amo in 16 nga mga classrooms han DepEd-Catarman. Naghangyo gihapon an LGU ha University of Eastern Philippines (UEP) nga magpagamit hin facilidad para magin Community Isolation Unit. An LGU in nagsubmiter han Isolation Management Plan ngadto ha DepED ngan UEP basi igpakita an detalye ug an plano han LGU hini nga aktibidad.

Didto naman ha Mapanas, Northern Samar, gin-aandam na gihapon in pira nga classrooms han Mapanas Agro-Industrial High School nga amo an magigin Qarantine Facility han ira mga mulopyo nga magkaka-uli.

Nagburublig an magkalainlain nga sektor han bungto ha paglimpyo han mga classrooms ngan pagbutang han mga higamit nga pagkikinahanglanon han mga igka-kwarentina. #