Isumat.com/9:49AM,May 20, 2020
An Calbayog City an nagin sentro han iru-istorya mahitungod han COVID-19 dara han lalaki nga residente han syudad nga nag positibo han corona virus ug gintotoohan nga nakatapon ha mga mulopyo han Tarangnan, Samar. Waray pa ngani ini huhugpoy nga mga iristorya mahitungod han Calbayog, aadi na liwat hin panhitabo nga magbubutang han syudad ha deri maupay nga ladawan.
Kakulop antis mag alas 5 an takna han kakurulpon, nabasag an mahimyang nga kahimtang han Barangay gadgaran han tigda la nga mawara ha insakto nga panmuruboot in usa nga lalaki ngan naghuramentado ini, nanmusil han hin-o man nga iya iginkakatapo ha kalsada. An makangingirhat nga resulta – Pito ka tawo an naawat an kinabuhi, upod an suspetsado.
Sumala han impormasyon nga nakuha han Isumat.com tikang ha record han Calbayog PNP ug iba pa nga surok, an suspetsado ngahi Glenn Balonan, residente han mao nga barangay ngan usa daw nga anay sundalo, in hubog hadto nga takna, gumawas ha iya panimalay ngan naghimo na hin samok. Bitbit an iya pusil, tigda na la ini nagpa-uran hin bala samtang nagbabaktas dida han kalsada.
Lakip han mga nagka-iigo ngan namatay amo an masunod – Carlo Saldania, 28 anyos, residente han Gadgaran; Gary Saldania, 34 anyos, taga Gadgaran gihapon; Jalita Ramada, aada ha insakto nga pangidaron ngan mulopyo han barangay; Vicente Lozano, 66 anyos, motorcab driver ngan taga Brgy Capoocan; Jimmy Jadulco, 45 anyos, taga Gadgaran; ngan Leopoldo Molat, 64 anyos ngan taga Brgy San Policarpo. Hi Molat an nahisumat nga Dead on the Spot samtang an iba pa an igindeklarar nga Dead on Arrival ha hospital.
Nag-antos hin igo hin bala hira Humphrey Tacaldo ngan Janine Bareto nga nag-uukoy gihapon han nasabi nga barangay. Nahisumat nga hi Tacaldo in aada yana ha kritikal nga sitwasyon.
An mga otoridad ha panguna ni Calbayog Chief of Police LtCol. Neil Montano in kadagmitan pumakadto ha lugar han insidente ug ira ginhalpat hi Balonan. Nakigpinusilay an suspetsado ha mga pulis ngan dida han balyu-ay hin punglo naigo hi Balonan rason han iya kamatay.
Nagpapabilin nga dako nga paki-ana kun ano an nagduso kan Balonan nga makahimo hini nga makarimadima nga krimen. Sumala han mga surok han Isumat.com, an suspetsado in nahipaslak na ha karsel hadto dara hin panigbas. Pira pala hiya ka tuig nga nakagawas ha presuhan dara han una niya nga kaso.
An Gadgaran in usa nga sudlonon nga barangay han Calbayog. Kun tikang ha Calbayog proper tikadto ha Northern Samar nga dereksyon, malikdo ha too pag-abot ha Brgy San Policarpo ngan pira pa ka minutos antis umabot ha Gadgaran. Dida han 2015 Census of Population, mayda haros dos mil an mga residente han mao nga lugar. # (KEVIN SIOSANA)
