Photo Courtesy via Facebook

Isumat.com/9:54AM, August 1, 2020

Waray pa ngani hul-os nga makakatukdaw tikang han pagdagmal ni Bagyo Ambo duha pala ka bulan an nakalabay, gintampalo hin dako nga kalayo an bungto han San Policarpo, Eastern Samar.

Gintapo han mga taga San Poli an pag-abri han bulan han Agosto hin makabibido nga panhitabo tungod han sunog kanina han maagahon ha Brgy 3 ngan Brgy 4. Sumala han nahikay nga impormasyon han Isumat.com, nagtikang an kalayo banda alas 4:15 han maagahon ngan na-alakbatan han paglalahinggab an unom nga kabablayan harani han munsipyo.

Iginpahayag pa han surok han impormasyon nga “faulty electrical connection” an gintotoohan nga kawsa han kalayo.

Naparong an nasabi nga sunog paghagos hin sobra duha ka oras kun diin nagburublig an mga bumbero han bungto ngan paghagrani nga munisipalidad pagpoypoy han kalayo.

Nahisumat nga dagko ngan konkreto nga kabablayan an nagkasusunog. Waray pa igpahayag han mga imbestigador kun pira an danyos han kalayo. Waray gihapon nahisumat nga nasamaran dida han sunog.

Ha deri pala maiha, haros 70 porsyento han kabablayan dida han mao nga bungto an nagkaruruba dara han pagbunal han makusog nga hangin ni bagyo Ambo. #