Isumat.com/Mayo 20, 2021
Lima nga kalalakin-an an nagka-aaresto tungod han deri otorisado nga pamaligya hin armas ngan medesina ha magkalainlain nga insidente ha Calbayog City ngan Northern Samar.
Dida han report han Calbayog City PNP, tulo nga suspetsado pagbaligya hin waray rehistro nga mga pusil an nagkadadakop ha Brgy Carayman han nasabi nga syudad. Hira in ginkilala kan Ryan Oyao, 30 anyos ngan nag-uukoy ha Brgy Cautod, Sta Margarita, Samar.
An iya mga kaupdanan amo hira Jerome Dizon, 26 anyos; ngan hi Gabriel Taduyo, 30 anyos, mga residente han Brgy Carayman.
An mga elemento han Calbayog PNP in nagpakilala nga poseur-buyer ngan nakapalit tikang ha mga suspetsado hin deri lisensyado nga 9mm pistol. Nakumpiskar gihapon tikang ha ira in mga magazines ngan mga bala.
Ha iba nga panhitabo, duha nga suspetsado an nasikmit han kapulisan ha bungto han Silvino Lubos, Northern Samar dara hin iligal nga pamaligya hin medesina.
Ginkilala an duha nga hira Eldrin Olivar, 32 anyos; ngan hi Alejandro Luzon, 43 anyos. Hira in taga Brgy Pansoy, Cebu City.
Mayda nagsumat ha mga otoridad nga hira Olivar ngan Luzon in nagsusudoy didto han bungto ngan nagbabaligya hin anti-biotic medecines ngan iba pa nga medesina. Ginpaki-anhan han kapulisan an mga suspetsado kun mayda ba hira kaangayan nga papeles han ira aktibidad.
Waray nahipresentar nga mga dokumento an mga gintatahapan sanglit gindara hira ha presinto.
Nakumpiskar tikang ha ira in onse ka kahon hin mga medesina nga ginlalakipan hin amoxicillin, metronidazole, lozartan, cotroxazole, mefanamic acid ngan kadam-an pa nga iba. Nakuhaan gihapon hira hin usa ka booklet hin mga resibo nga waray rehistro.
Nag-warning an Northern Samar PNP ngadto ha publiko nga deri pumalit hin mga medesina ha deri otorisado nga personalidad kay bangin peke ini ngan magdurot hin peligro ha panlawas.
An mga suspetsado han duha nga panhitabo in nakapaslak ha karsel ngan ginsampaan na han kaangayan nga mga kaso. #
