(Image by philippine lifestyle.com)

Isumat.com/Mayo 19, 2021

An mga operatiba han Philippine Drug Enforcement Agency (PDEA)- Eastern Visayas in nakasikmit hin lima nga suspetsado han pagrondahon an usa nga drug den ha Brgy 43-A, Quarry District, Tacloban City hadin nag-agi nga adlaw.

Ginkilala an mga gintatahapan nga hira Joshua Ramos ngan John Paul Labiran. Hira an gintutudlok nga nagmementenar han drug den. An duha nga suspetsado in nag-eedad hin 19-anyos.

Na-aresto gihapon dida han pagronda an tulo pa nga iba nga nakadto han sulod han drug den ug ginkilala ini nga hira Felipe Gayoso, John Barredo ngan Remuel Magalona. Subay han report, hira in nag-uukoy dida mismo han barangay.

Nakumpiskar tikang han mga suspetsado in unom ka sachet hin gin-aalegar nga shabu porlomenos 6 gramos an timbang ngan nagkakantidad hin 41 Mil Pesos. Nakuha gihapon tikang ha ira in .2 grams hin marijuana.

Samtang hadin Mayo 17, duha nga kalalakin-an an nadakop ha drug buy-bust operation nga gindumara han kapulisan ha Brgy 91, Abucay, Tacloban, pasado ala 1 han maagahon.

An mga suspetsado in ginkilala nga hira Carlito Collarda, alyas Bentong, 18 anyos; ug an 16-anyos nga hi alyas Jomar. Hira ngaduha in mga residente han Brgy 93, Bagacay, Tacloban.

Narekupo tikang han mga suspetsado in unom ka sachet hin gintotoohan nga shabu balor hin 10,500 pesos.

An naghimo han operasyon amo an mga elemento han Tacloban PNP Station 2-Drug Enforcement Unit ha panguna ni Lt Rey Baldicano ha ilarum han superbisyon ni Station 2 Chief Capt Winrich Lim.

An mga suspetsado han duha nga insidente in aada ha kustudiya han mga otoridad ngan nakatalaan umatubang han mga kaso nga iginpasaka kontra ha ira. # (with report from Noel Tampil Sianosa MRN-NTS)