Isumat.com/7:20AM,July 02, 2020

Waray matatagamtaman nga Cash Grant an mga pamilya nga kaapi han Pantawid ng Pamilyang Pilipino Program (4Ps) kun deri igpa-rehistro an ira anak nga ma-eskwela para han tia-arabot nga School Year 2020-2021.

Hi Paula Unay, Provincial 4Ps Officer han DSWD in nagsaysay nga an panuyo han Cash Grant amo an pagduso han kablasanon nga pamilya nga pa-esklwelahon an ira anak. Kun deri magpa-enroll, waray gamit an nasabi nga ayuda pinansyal.

Hinungdan hini, hi Unay in mahugot nga nanawagan han miembro nga mga pamilya nga igpa-enroll an ira anak. An Enrollment Period ha pampubliko nga eskwelahan in natapos na dida han Hunyo 30, pero ginpahiilawig ini han Department of Education tobtob Hulyo 15, 2020.

An Department of Education in nagbuyagyag nga damo pa hin duro an waray magpa-enroll. Damo an kag-anak nga nababaraka nga matapnan an ira anak kun pasudlon ha eskwelahan.

Igindugang pa ni Unay nga hapagkayana, aada ha insakto nga oras an panhatag han Cash Grant pinaagi ha ATM ngan waray nalalangan nga pagbukalas han pondo.

Pero nag-esplikar hi Unay nga nadedelatar yana an ayuda han 4Ps pinaagi han Philippine Veterans Bank tungod nga waray pa ka-aprobari an Memorandum of Agreement ha butnga han bangko ngan DSWD. Ginklaro niya nga an pagproseso hini in gintatrabaho ha DSWD Central Office ngan deri ha Regional Office. # (KEVIN SIOSANA)