Isumat.com/12:26PM, Pebrero 19, 2021

Magkalain-lain nga mga rason an gintutudlok nga hinungdan han pagpakamatay hin upat ka tawo ha Rehiyon Otso hadin nag-agi nga duha ka adlaw.

Dida han Pebrero 18, Huwebes, tulo an nag-suicide nga iginreport ha mga PNP Stations ha magkalain-lain nga parte han rehiyon. Syahan nga insidente in didto ha Brgy Calomotan, Laoang, N. Samar kun diin ginkilala an biktima nga hi Reynold Cerbito, 45, anyos, waray asawa ngan tricycle driver.

Pasado alas 9 han aga han matad-an han bugto han biktima nga nabitay an lawas ni Reynold nga nakahigot an liog ha puno han Catmon, namumutang mga 200 metros tikang ha balay han biktima. Gindara pa ha hospital an biktima pero gindeklarar nga Dead on Arrival. Nagsering an pamilya han biktima nga posible “mental depression” an hinungdan han panhitabo.

Hadto gihapon nga adlaw, banda alas 11 han aga, nagpakamatay pinaagi han pagsunog han iya kalugaringon hi Rowena Arizo, 49 anyos, waray asawa, waray trabaho ngan residente ha Sitio Pasakay, Brgy San Pedro, Tunga, Leyte.

Nadiskubre han magurang nga bugto han biktima an sunog nga patay nga lawas ni Rowena han manunubong unta hiya han ira baboy ha luyo han ira balay. Natad-an didto in surudlan hin gasolina ngan lighter. Gintotoohan nga ginbuhusan han biktima hin gasolina an ginponpon nga dahon hin saging ngan iya iginplastar dida an iya lawas. Nagsering an mga paryente nga usahay deri namumutang an biktima tungod han iya sakit ha kasing-kasing.

Pagka alas 4 han kulop, Pebrero 18 gihapon, natabo an pag-suicide hin lalaki ha Brgy Catubli-an, Hinunangan, Southern Leyte. Ginkilala an biktima nga hi Melchor Claridad, 25 anyos, waray asawa, ngan waray trabaho.

Dida han imbestigasyon, nakig-tagay pa hi Melchor ha iya kasangkayan dida han udto. Pagka alas 2, iya ginbayaan an iya mga katarangka ngan pumakadto han ira umhanan. Paghagos hin usa ka oras, an nanay ni Melchor in pumakadto han umhanan basi manginano han ira karabaw, ngan iya nakit-an didto han payag-payag nga nakabitay an iya anak pinaagi hin nylon nga higot ngadto han atop. Waray pa katutudlok an posible nga rason han pagsuicide ni Claridad.

Hadton Pebrero 17, usa naman nga anay OFW an nagpakamatay pinaagi gihapon hin paghikog ha Brgy Canramos, Tanauan, Leyte. An babaye nga 48-anyos in may asawa ngan mga anak. Iya gingamit an taklap paghigot han iya liog ngadto han alkoba han ira balay.

Hinsabutan nga pira na ka beses nga nagpruweba pagpakamatay an biktima pero nababantayan ini han iya pamilya. Dako nga personal nga problema nga nakadangat ngadto hin depresyon an gintutudlok nga rason han paghikog. #