Isumat.com/2:23PM,May 15, 2020

24 na katawo an natapnan han corona virus ha Sinirangan Bisayas. Ini in katapos la igpasamwak han DOH-Region 8 yana nga kulop nga mayda bag-o nga upat ka tawo an positibo han kagaw.

Sumala han report han ahensya, an upat nga bag-o nga kaso in ngatanan taga Tarangnan, Samar.

Hi Patient# 21 in 22 anyos nga lalaki nga driver han ambulansya; hi Patient # 22 in 63-anyos nga lalaki nga retirado nga empleyado; babaye nga 18 anyos naman hi Patient#23 ngan babaye gihapon an 21 anyos nga Patient #24. Hira Patient 23 ngan 24 amo in magbugto, sumala kan DOH-Regional Information Officer John Paul Roca.

Hi Patient #22 in dadad-on ha Samar Provincial Hospital dara han iya edad nga sobra na saysenta anyos, samtang an iba in magpapabilin ha Isolation Unit ha Tarangnan.

Ini nga upat nga nag positibo in lakip dida han 156 nga swab samples nga ginpa ilarum han confirmatory test han EVRTC Molecular Laboratory han nag-agi nga pira ka adlaw. An iba nga samples in tanan negatibo.

Dara hini nga bag-o nga mga kaso, nagsering an DOH nga nagpapadayon an community transmission han Covid-19 didto han nasabi nga bungto kun diin 19 na nga residente an natapnan.

Igindugang pa han DOH nga igpapadayon an mahugot nga contact-tracing ngan mass testing didto han mao nga munisipalidad. # (KEVIN SIOSANA)