Isumat.com/8:38AM,April 25, 2020

Paghagos hin tulo ka semana tikang igpasamwak han gobyerno nga makarawat hin ayuda pinansyal an mga kablas tungod han COVID-19 pandemic, 30 pala nga mga Local Government Units ha Rehiyon Otso an natagan han nasabi nga hinabang.

An Social Amelioration Program (SAP) amo an cash assistance tikang ha gobyerno para han mga pamilya nga naghihimakuri tungod hini nga krisis, ug denhi ha Eastern Visayas tag singko mil pesos an ma-aagoman han kada benefeciario nga kwalipikado.

Subay han gibabag-uhi nga report han DSWD-Region 8, dida han sobra 140 nga LGUs han rehiyon, trenta pala an nakakuha han ayuda panalapi tobtob kakulop, Abril 24, 2020.

Ha probinsya han Leyte, amo ini an mga munisipalidad han Barugo, Albuera, San Miguel, Santa Fe, MacArthur ngan Bato. Ddidto naman ha Biliran Province, an bungto pala han Culaba an natagan hini.

Para naman han Southern Leyte, nakakuha na hini nga hinabang an Hinundayan, Libagon, Limasawa, Lilioan, Padre Burgos, Silago ngan Tomas Oppus.

An mga bungto naman han Can-avid, Hernani, Balangkayamn, Llorente, Oras, San Policarpo ngan Sulat an ha Eastern Samar. Ha Northern Samar, duha pa la nga bungto ug amo ini an Bobon ngan Mondragon.

Ha lalawigan han Samar, nakakuha na an Gandara, Basey, Calbiga, Jiabong, Motiong ngan San Jose de Buan.

Ha pito nga syudad han rehiyon, an Borongan City pala an natagan hini nga bulig. Dida hini nga mga LGUs nga natagan na, sobra hin 141 milyones pesos na ini nga kantidad para hin 23 mil nga beneficiario.

Sumala han DSWD, padayon pa an ira ginbubuhat nga validation han mga listahan nga iginsubmiter han iba nga LGUs. Ini nga mga LGUs in nagpirma hin Memorandum of Agreement upod an DSWD para han pamaagi han pagbukalas han pondo.

Subay gihapon han mga impormasyon nga nakakadangat ha Isumat.com, gin-uuran na hin mga reklamo in kadam-an nga barangay captains dara han mga alegasyon nga may ginpapaboran nga iginlista bisan kun deri angay matagan han hinabang.

An DILG in nagmando nga kinahanglan igpaskin ha mga barangay hall an lista han mga beneficiario basi mapamatud-an kun tinangkuray an panlista hini. Nag warning na an DILG nga magbabaton hin mga kaso an mga opisyal han LGUs nga mapapamatud-an nga nagbuhat hin linorong ha pagpili han mga beneficiario. #