Isumat.com/4:25PM,May 19, 2020
Titikangan na an panhatag hin tag Dos Mil Pesos para han mga panimalay ha Eastern Samar nga waray makatagamtam han cash assistance ha ilarum han Social Amelioration Program han National Government.
Kakulop nga adlaw, an Sangguniang Panlalawigan ha panguna ni Vice-Governor ngan Presiding Officer Maricar Sison-Goteesan in nag-aprubar han hangyo ni Governor Ben Evardone nga pondo para han waray makakarawat han SAP.
Ngatanan han mga Board Members nga presente dida han sesyon in umabuyon pagtangdo han resolusyon nga nag-aalotaga hin 60 Milyones pesos para han 30 Mil nga panimalay. An kada panimalay in makarawat hin Dos Mil pesos.
Deri na makakatagamtam hini an mga benefeciario han SAP nga nakakuha han tag Singko Mil pesos. Deri gihapon upod hini an miembro han 4Ps, TUPAD, ngan SURE Aid.
An mga Barangay Health Workers ngan Tanods in makarawat hin kadugangan nga 500 pesos kay natagan naman hira hin 1,500 pesos hanhadi. Sugad man gihapon an Barangay Nutrition Scholars in tag 800 pesos an makakarawat kay mayda naman hira 1,200 pesos nga naha-una.
Iginkalipay naman ini han mga residente han probinsya labi na nga naghihimakuri yana hira dara han grabe nga epekto ni bagyo Ambo. Antis pa an bagyo, iginpatapod na ni Evardone ini nga ayuda nga Dos Mil para han waray maka-agom han SAP, ug kakulop gin-aprobaran na ini han Sangguniang Panlalawigan.
Gintangduan gihapon dida han sesyon an pagdeklarar han State of Calamity ha mga bungto han Arteche, San Policarpo, Oras, Jipapad, Maslog, Dolores, Can-Avid, Taft nga Sulat dara han distroso han bagyo. Pinaagi hini, makakagbukalas hin pondo an Provincial Government tikang han Calamity Fund para han apektado nga mga bungto han kalamidad. # (KEVIN SIOSANA)
