(file photo)

Isumat.com/Hunyo 16, 2021

Usa nga CAFGU member ngan mag-asawa nga rebel returnees an natad-an nga patay ngan gintotoohan nga “gin-salvage” didto ha Calubian, Leyte kakulop, Mierkules, Hunyo 15.

Ginkilala an mga biktima nga hira Albert Aldiano, kaapi han CAFGU ngan residente han Kananga, Leyte; ug an mag-asawa nga hira Paquito ngan Melba Mahinay, nag-uukoy ha Brgy Anislagan, Calubian. An magti-ayon nga Mahinay in anay mga rebelde nga nagsurender hadto ha gobyerno.

Natad-an an patay nga lawas han mga biktima pasado alas 3 han maagahon ha sulod han sementeryo ha Brgy Padoga, Calubian. An duha nga kalalakin-an in mayda mga igo hin bala ha magkalainlain nga parte ha lawas, samtang an babaye in mayda mga kasamdan tungod hin panigbas.

An duha nga kalalakin-an in iginhigot ngadto hin motorsiklo nga kawasaki.

Dida han inisyal nga imbestigasyon, katapusan nga nakit-an nga buhi an mga biktima hadton pasado alas 5 han kulop han Hunyo 14 didto ha Brgy Anislagan kun diin hira Paquito ngan Albert in nagmomotor ug ira ginkukuha hi Melba basi umupod ha ira ngadto han kampo ni Aldiano ha Kananga.

Ini nga panhitabo in gin-iimbestigar pa agud matudlok an nagpapaluyo han krimen.

Samtang, usa naman nga menor de edad an namatay han magkaada hin rambol ha Brgy 37, Reclamation Area, Tacloban City hadton Domingo han gab-i.

An biktima nga waray pagngarani in namatay tungod han mga buno hin pisaw nga iya gin-antos. Nadara pa ha hospital an biktima pero gindeklarar nga dead on arrival.

Nadakop naman an suspetsado nga ginkilala nga hi Ronnel Sumeguin, 21 anyos, nag-uukoy ha Brgy 36, Sabang District.

An mga kapulisan in nag-iimbestigar kun ano an nagin rason nga nagkamay-ada man hin riot didto han nasabi nga lugar. #