Isumat.com/7:30AM, July 10, 2020

Umabot na ha 614 an nagin pasyente han COVID-19 ha Sinirangan Bisayas. Iginreport han DOH Regional Office kakulop (Hulyo 9) an bag-o nga tulo nga kaso ug hira in mga Locally Stranded Individuals (LSI).

An bungto han Mahaplag, Leyte an nagbadlis han ira syahan nga kaso ngan hiya in LSi tikang ha Cebu nga umabot didto han bungto hadton Hunyo 20. Hapagkayana, maupay an iya panlawas ngan aadto ha Quarantine Facility han LGU. Nagdudumara naman an LGU hin contact tracing .

Ha luyo nga bahin, may nahidugang nga kaso ha La Paz, Leyte pero igindig-on han LGU nga naka-recover na an pasyente. Ini in tungod kay tulo na ka semana hiya nga naka-kwarentina tikang han iya pag-abot hadton Hunyo 14 tikang ha Cebu. Deretso hiya ha Quarantine Unit han bungto tikang han iya pag-abot. Nagin maupay an iya kahimtang ngan waray sintomas dida han 21 ka adlaw nga kwarentina sanglit talwas na hiya han virus, pahayag pa han LGU. Tungod hini, an 18 nga natapnan ha La Paz in tanan naka-recover na.

Ha Libagon, Southern Leyte, tikang gihapon ha Cebu an bag-o nga Positive Case. Hiya an ika-18 nga COVID Patient dida han munisipalidad pero 14 ha ira an naka-recover na. An LGU-Libagon in nagpapamulat pa han laboratory result para hin 24 nga residente nga ira iginpa-swab test.

Dida han report han DOH, 498 na an recoveries han 614 nga natapnan. Nagpapabilin nga tulo nga pasyente an namatay tungod han komplikasyon durot han corona virus. #