(photo by blogspot.com)

Isumat.com/7:20AM, December 30, 2020

Tungod la hin butete, nagin trahedya imbes nga magigin malipayon an pagtapo han bag-o nga tuig han mga paryente ngan pamilya han tulo ka katawo nga nahilu-an ngan namatay tungod han pagkaon han nasabi nga isda.

Dida han report han Tabango, Leyte PNP Office, ginkilala an mga naawat an kinabuhi nga hira Restituto Sumalinog, 63 anyos; Lucresia Anislagon, 49 anyos; ngan hi Ramil Catamisan, 40 anyos. Hira in nadara pa ha hospital pero gindeklarar nga Dead on Arrival.

Labot la han tulo nga namatay, nahilu-an gihapon in upat pa nga iba ngan gindara ha hospital. An usa ha ira in naka-recover na, samtang an tulo in padayon pa nga gintatambal. An ngatanan nga mga biktima in mga residente han Sito, Patag, Brgy Tabing, Tabango.

Dida han imbestigasyon han Tabango PNP, nangaon an mga biktima han butete nga ginluto han usa ha ira nga nagbabaligya hin barbecue. An barbecue vendor in nagluto han butete ngan iya ginhatag hin libre han iya mga suki ha barbekyuhan.

Paghagos hin pira ka minutos tikang han ira pangaon, naka-abat na hira hin duro kamalipong ha ulo, dungan han pagsinuka ngan katapus-tapusan nagkadidismayo. Dida hini, kadagmitan gindara hira ha hospital ngan tulo ha ira an tumalikod ha kadayunan.

Kasumpay hini nga panhitabo, utro iginpasamwak han Bureau of Fisheries and Aquatic Resources (BFAR) nga igindederi gud an pagkaon han butete, labi na an atay ug an sulod han ginhawa hini nga isda. Nagsering an BFAR nga an butete in nagdadara han makahirilo nga elemento tinatawag “Tetrodotoxin.” Ini in magreresulta hin paglipong, convulsion, napaparalisar an respiratory system ngan pagkamatay.

An butete in tinatawag nga “Puffer Fish” ha English. Ha mga kadagatan ha Pilipinas, hamurasak ini nga klase hin isda. Subay han mga impormasyon, an tawo nga makakaka-on hini in maabat han sintomas han kahilu-i ha iya 20 minutos ngadto ha dos oras tikang han pagkaon. #