Isumat.com/8:41AM, May 12, 2020

Bantay-sarado yana in tulo ka tawo nga tikang ha Catbalogan ug nakasulod ha Tacloban City. Hira in naka-uli ngadto ha Brgy 84, San Jose.

Hi Brgy Kapitan Dexter Bahin in nagpahayag nga iya minandu-an ini nga mga tawo nga deri gud gumawas ha ira tagsatagsa nga panimalay ha sakob hin duha ka semana basi mabantayan an ira panlawas. Iya pa iginpatapod nga an barangay an maghahatag hin pagkaon ha ira basta sumunod la han mando nga kwarentina.

Napapa-usa hi Bahin kun kay-ano nga nakalusot ha mga checkpoints ini nga mga tawo bisan waray dara nga mga dokumento, labi na gud nga tikang hira ha Catbalogan kun diin mayda usa ka tawo nga nag positibo han corona virus.

Dara hini, iginbalik dida han barangay an ira controlpoint basi deri na ma-utro ini nga panhitabo.

An Tacloban in nagpapabilin nga COVID-free tobtob yana, pero may 25 nga Suspected Cases kun diin lima an naka-admit ha hospital ngan 20 an naka Home Isolation. # (KEVIN SIOSANA)