Isumat.com/Marso 3, 2022
Kadam-an nga bungto ha Eastern Visayas in waray pa makagpasa ngan maka-aprobar han ira tagsatagsa nga budget para han 2022, sumala kan DILG Regional Director Reynaldo Escober.
Tungod hini, namemeligro nga damo nga importante nga proyekto ngan serbisyo han LGU an deri maaagoman han mga bungtuhanon, sering ni Escober ha interview han iFM-RMN Tacloban yana nga adlaw, Marso 3, 2022.
Nagsering an DILG Director nga ira na ginsuratan an mga gobernador han mga probinsya basi manginano hini nga kahimtang han budget ha mga munsipalidad nga ira nasasakupan. An mga gobernador amo an may obligasyon pagbulig ha mga bungto nga nalalangan an pagpasa han budget han ira mga Sangguniang Bayan, sering pa ni Escober.
Iginbuyagyag niya nga pira na nga mga LGU an nagsubmiter han ira written explanation ha DILG mahitungod han kadelatar han budget, pero an mga rason in deri matood-tood. An mga Sangguniang Bayan ngan Sangguniang Kabataan an ginpapa-esplikar hini nga kahimtang, dugang pa ni Escober.
Gintagan hin duon ni Escober nga kinahanglan mahipasa ngan ma-aprobaran na an pondo han nasabi nga mga bungto kay Marso na yana ngan mapipi-angan an serbisyo ha katawhan.
Urog nga mapiperwisyo amo an mga programa para han pagpatindog han ekonomiya ngan pakabuhi tungod han pandemya. Apektado gihapon an iba nga serbisyo sugad han panlawas ngan edukasyon nga igintubyan han National Government ngadto ha mga LGUs.
Ha ilarum han Mandanas Ruling han Korte Suprema, an mga LGU in magkakaada hin dako nga pondo tikang yana pero an mga serbisyo nga iginhahatag hadto han national government in trabaho na yana han LGU, sanglit angay gud nga magkaada na hin budget, sering pa ni Escober.
Usa han mga rasones amo an deri pagkasabot han mayor ngan SB sanglit nagdudurot ini hin dilito ha pagpasa han budget.
An mga bungto nga waray pa 2022 Budget amo an masunod: Ha Probinsya han Leyte – Alangalang, Jaro, Sta Fe, San Miguel, Tunga, Palompon, Matag-ob, MacArthur, La Paz ngan Dagami.
Probinsya han Samar – Hinabangan, Pagsanghan, San Jorge, San Jose de Buan, Santa Rita, San Sebastian ngan Tagapul-an.
Eastern Samar – Balangiga, Giporlos, Lawaan, llorente, Hernani, Gen MacArthur, San Policarpo ngan San Julian.
Northern Samar – Catubig, Las Navas ngan Victoria.
Ha Biliran ngan Southern Leyte, ngatanan na han mga bungto in nanhipasa na an ira tagsatagsa nga pondo para yana nga tuig.
Kasumpay hini, gin-aghat ni Escober an katawhan nga deri mag-alang pagpaki-ana ha mga opisyal nga nadadabi ha pagpanday han budget kun kay-ano nga tobtob yana waray pa man nira katatapos ini nga ira obligasyon.
Sering pam han Director, maiha na nira nga pirmi ginpapahinumdom an mga LGUs nga deri ig-delatar an budget kada tuig kay apektado hini an benipisyo han mga mulopyo. #
