Isumat.com/9:20AM, July 14, 2020

Katapos han duha ka semana nga suspensyon han pagkabalik han Locally Stranded Individuals, haros 300 an nagka-abot kakulop (Hulyo 13) nganhi ha Region 8. Kasagaran ha ira in tikang ha Cebu.

Sumala han pahayag han Philippine Coast Guard-Eastern Visayas, pira nga mga barko an dumu-ong kakulop ha Calbayog, Ormoc, Bato ngan Lilo-an. Luran denhi an mga LSI tikang ha probinsya han Cebu, Bogo City, Cebu City ngan Surigao.

Hira in gintapo han mga service vehicles han tagsatagsa nga Local Government Units. Ginseguro han Coast Guard nga kumpleto an mga papeles han nasabi nga mga LSI nagpapakita nga nagpa-ilarum hira hin kwarentina ngan deri hira positibo han COVID-19.

Igindugang pa han report nga an mga tripulante han mga barko an deri gintutugutan nga humaw-as dida han mga pantalan ngan magpapabilin la hira ha barko. An mahaw-as la an mga pasaheros.

Maabot naman hin 150 nga LSI nga na-stranded ha Region 8 an nakalakat gihapon kakulop tikadto han ira mga lugar ha Luzon ngan Mindanao. An iba ha ira in lumakat tikang ha Northern Samar ngadto ha Matnog Port, Sorsogon, samtang an iba naman in sumakay tikadto ha Cebu ngan Surigao.

An Coast Guard-Eastern Visayas in padayon nga nakikigsumpayan han mga otoridad ha iba nga lugar basi maseguro nga waray makakalusot nga LSI ug tanan nga mabalik pinaagi han mga barko in kumpleto han kaangayan nga mga papeles. #