(File photo by pna.gov.ph)

Isumat.com/Hulyo 26, 2022

An mga “bagets” nga bag-o nga botante amo an gidadamu-i nga nagparehistro dida han gindumara nga tulo ka semana nga Voters’ Registration han Commission on Elections-Eastern Visayas.

Subay han pahayag han COMELEC Regional Office, dida han 253, 070 nga aplikasyon nga ira nakarawat, an nagpalista nga bag-o nga bumurotos nga nag-eedad hin 15-17 anyos amo in 158, 782. Ini nga mga bagito nga botante in nagparehistro para han Sangguniang Kabataan nga piniliay.

Ha luyo nga bahin, an New Registrants nga nag-eedad hin 18-30 anyos in 38, 158; samtang an bag-o nga nagpalista nga may pangedaron 31 anyos tipa-igbaw in 2,531.

Mayda naman 53, 589 para han iba nga transaksyon sugad han pagbalhin hin presinto ngan pagbag-o han personal information.

Gindumara ha bug-os nga nasud an panrehistro tikang Hulyo 4 tobtob Hulyo 23 para han pangandaman han igintalaan nga SK ngan Barangay Elections hiton Disyembre 5, 2022.

Ha bug-os nga Pilipinas, umabot hin 2.9 Milyon an bag-o nga nagparehistro nga botante. Ini in nagpanlalapos han pagbanabana han COMELEC nga 2 Milyones la.

Hapagkayana, hingpit an pangandaman han komisyon para han eleksyon, bisan kun may mga balaudnon nga iginsalawad ha Kamara De Representantes ngan Senado may panuyo nga ig-ugsod ngadto ha sunod nga tuig an piniliay. #